കുട്ടിക്കലാകാരി

ദുന്യ മിഖൈല്‍

എനിക്ക് ആകാശം വരയ്ക്കണം
വരയ്ക്കൂ മോളേ
വരച്ചു
എന്താ നിറങ്ങളിങ്ങനെ പരത്തി പൂശിയിരിക്കുന്നത്?
ആകാശത്തിന് അറ്റമില്ലാത്തതുകൊണ്ട്
..
എനിക്കു ഭൂമി വരയ്ക്കണം
വരയ്ക്കൂ കുട്ടീ
വരച്ചു
ഇതാരാ?
അവളെന്റെ കൂട്ടുകാരി
അപ്പൊ ഭൂമിയെവിടെ?
അവളുടെ കൈസഞ്ചിയില്‍.
..
എനിക്കു ചന്ദ്രനെ വരയ്ക്കണം
വരയ്ക്കൂ വരയ്ക്കു
പറ്റുന്നില്ല
എന്തേ?
അതിനെ തിരമാലകള്‍
മായ്ച്ചുകളയുന്നു.
..
എനിക്കു സ്വര്‍ഗ്ഗത്തെ വരയ്ക്കണം
ഓ വരയ്ക്കു
വരച്ചു
പക്ഷെ നിറങ്ങളൊന്നും കാണുന്നില്ലല്ലോ?
അതു നിറമില്ലാത്തതാണ്.
..
എനിക്കു യുദ്ധം വരയ്ക്കണം
വരയ്ക്കു, കാണട്ടെ
വരച്ചു
ഇതെന്താ ഒരു ചെറിയ വട്ടം?
ഊഹിച്ചു പറയൂ
ഒരു തുള്ളി ചോര?
അല്ല
വെടിയുണ്ട?
അല്ല
പിന്നെന്താണ്?
ഒരു ബട്ടന്‍ –
വിളക്കുകള്‍ അണയ്ക്കാനുള്ളത്.